Toshkent viloyatidagi ayrim fuqarolar foydalanilgan gaz uchun to‘lovlarni o‘z vaqtida to‘lamagani ma’lum bo‘ldi

Aholini yil davomida, ayniqsa, kuz-qish mavsumida tabiiy gaz bilan uzluksiz ta’minlash bo‘yicha Toshkent viloyatida muayyan ishlar amalga oshirilmoqda, deb xabar beradi O‘zbekiston Milliy axborot agentligi.

“Toshkentgazta’minot” unitar korxonasi tomonidan mavsumga puxta hozirlik ko‘rildi. Tayyorgarlik ishlari doirasida 558,4 kilometr masofadagi yer osti gaz tarmoqlari ko‘rikdan o‘tkazildi. 17,5 kilometrlik gaz quvurlari mukammal ta’mirlandi. O‘rta Chirchiq, Piskent, Oqqo‘rg‘on, Bo‘ka, Quyi Chirchiq tumanlaridagi 8000 ga yaqin gaz taqsimlash nuqtasi nazoratdan o‘tkazildi.

Ayni paytda aholi, korxona va tashkilotlar, ta’lim va tibbiyot muassasalari hamda madaniy-maishiy inshootlarni kuz-qish mavsumida uzluksiz tabiiy gaz bilan ta’minlashga qaratilgan ishlar izchil davom ettirilmoqda.

Biroq tabiiy gaz ta’minotini yanada yaxshilash bo‘yicha amalga oshirilayotgan chora-tadbirlarga qaramay, gazdan noqonuniy foydalanish, to‘lov intizomiga rioya qilmaslik holatlari uchramoqda.

“O‘tkazilgan tekshiruvlar chog‘ida Chirchiq va Olmaliq shaharlari, Zangiota, Ohangaron va Piskent tumanlarida istiqomat qiluvchi ayrim fuqarolar foydalanilgan gaz uchun to‘lovlarni o‘z vaqtida to‘lamagani ma’lum bo‘ldi, — dedi “Toshkentgazta’minot” unitar korxonasi rahbari Akmal Yo‘ldoshev. — Bunday holatlarning oldini olish maqsadida tegishli idoralar bilan hamkorlikda aholi o‘rtasida tushuntirish ishlari olib borilmoqda. Har bir mahallada bu boradagi ishlarga mas’ul fuqarolar biriktirilgan. Qonunbuzarlarga qarshi qat’iy jazo choralari qo‘llanilmoqda”.

Viloyatda olib borilayotgan bu boradagi ishlar natijasida aholining tabiiy gazdan qarzdorligi kamaymoqda.