Rossiyada Muhammad (s.a.v) payg‘ambarga bag‘ishlangan elektron kitob eng ko‘p sonli mualliflar tomonidan yozilishi bo‘yicha noyob ijtimoiy loyiha − “100K Muhammad” loyihasi boshlandi, deb xabar bermoqda “RIA Novosti”.
Loyiha muallifi bo‘lgan Ummagazine kundalik internet-nashri xabarida aytilishicha, 100 ming kishi insonlarning eng yaxshisi haqida dunyodagi eng foydali kitobni yozadi.
Loyihaning asosiy maqsadi odamlarga o‘zlarining so‘nggi payg‘ambarga bo‘lgan muhabbatini ifodalash imkonini berish ekanligi aytilgan. Loyiha yordamida ko‘plab insonlar Muhammad (s.a.v.) haqida bilib olishlari ham ko‘zlangan. Bundan tashqari, eng ko‘p sonli hammualliflar ishtirokida kitob yozish bo‘yicha Ginnesning rekordlar kitobiga kirish ham rejalashtirilgan.
Turli mamlakatlarda yashovchi 100 ming kishi tomonidan yuborilgan Muhammad (s.a.v) haqidagi iqtiboslar “Insonlarning eng yaxshisi − Muhammad (s.a.v.). 100 000 iqtibos. 100 000 muallif. 1 kitob” nomli kitobda chop etiladi. Loyihada ishtirok etish uchun ro‘yxatdan o‘tish va Muhammad (s.a.v.) to‘g‘risidagi iqtiboslarni o‘z ona tilida yo‘llashi lozimligi kifoya qilishi ta’kidlangan.
Hozirda rus va ingliz tillarida ishga tushirilgan loyiha turk, arab, nemis va fransuz tillarida ham faoliyat ko‘rsatishni boshlashi ko‘zda tutilgan. Kitob tuzilishi yakunlangach nafaqat iOs va Android tizimlari uchun elektron shaklda, balki bosma shaklda ham chop etilishi rejalashtirilgan.
Izoh (0)