Ukrainada namoyish etilayotgan Rossiya serialidagi Putinning suratlari xiralashtirib qo‘yilmoqda
“Ukraina” telekanali Rossiya seriallarini namoyish etish chog‘ida kadrda Rossiya Federatsiyasi prezidenti Vladimir Putinning surati chiqib qolsa, uni xiralashtirib qo‘ya boshladi. Bu haqda “Korrespondent.net” xabar bermoqda.
Xususan, Rossiya politsiyasi faoliyati haqida hikoya qiluvchi “Pyatnitskiy” seriali namoyish etilayotganida, Rossiya yetakchisining portreti xiralashtirib qo‘yilmoqda.
Televideniye va radioeshittirish masalalari bo‘yicha Milliy kengash rahbarining birinchi o‘rinbosari Olga Gerasimyuk idora tomonidan Ukraina telekanallariga Putin suratini noaniq qilib qo‘yish bo‘yicha hech qanday buyruq va tavsiya berilmaganini ma’lum qildi. Uning aytishicha, bu telekanalning o‘zigina chiqargan qarordir.
Shu bilan bir vaqtda, Rossiya prezidenti portretining xiralashtirib qo‘yilayotgani “Ukraina” telekanali matbuot xizmati tomonidan tasdiqlandi. Biroq ular bu qarorga izoh berishdan bosh tortdi.
