Og‘ir atletika bo‘yicha Afro-Osiyo chempionatida Shodilbek Ergashev oltin medalni qo‘lga kiritdi
Toshkentda og‘ir atletika bo‘yicha davom etayotgan I Afro-Osiyo chempionati va III Osiyo kubogining navbatdagi kuni ham sportchilarimiz uchun omadli keldi, deb xabar bermoqda O‘zbekiston Milliy axborot agentligi.
Chempionatning vazni 94 kilogrammgacha bo‘lgan polvonlar bahsida ishtirok etgan hamyurtimiz Shodilbek Ergashev dast ko‘tarishda 148 kilogramm natija ko‘rsatib, musobaqaning oltin medaliga sazovor bo‘ldi. U siltab ko‘tarishda 176 kilogramm, ikkikurash yakuniga ko‘ra 324 kilogramm natija bilan ikkita kumush medalga ham ega bo‘ldi.
Osiyo kubogida sportchimiz Muhammad Begaliyev 85 kilogramm vazn toifasida munosib ishtirok etdi. U dast ko‘tarishda 155 kilogramm shtangani o‘ziga bo‘ysindirib, kumush medalni qo‘lga kiritdi. Siltab ko‘tarishda 182 kilogramm natija bilan bronza medal sohibi bo‘ldi. Ikkikurash yakuniga ko‘ra 337 kilogramm natijani qayd etgan polvonimiz ikkinchi o‘rinni egalladi.
