O‘zbekiston hukumati qarori bilan aholisi 20 ming kishidan ziyod bo‘lgan shaharlar va qishloqlarni batafsil rejalashtirish loyihasini ishlab chiqish dasturi tasdiqlandi. Bu haqda Uzbekistan Today axborot agentligi xabar bermoqda.

Dasturga ko‘ra, 2005—2018-yillarda 108 ta shahar va qishloq uchun batafsil rejalashtirish loyihalari (BRL)ni ishlab chiqish ko‘zda tutilgan.

“O‘zshaharsozlik LITI” va “Toshkentboshplan LITI” Davlat unitar korxonalari dasturga kiritilgan Toshkent, Nukus va viloyat markazlarida batafsil rejalashtirish loyihalarining ishlab chiquvchilari etib tayinlandi.

Muhandis-geologik qidiruv ishlarini olib borish, topografik xaritalar hamda BRL ishlab chiqish uchun reja tuzish ishlari ijrosi “O‘zGASHKLITI” Davlat unitar korxonasi tomonidan ta’minlanadi.

Aholi punktlari qismlarida batafsil rejalashtirish loyihalarini ishlab chiqish dasturi, muhandislik qidiruv ishlarini olib borish, shahar qurish hujjatlarini ekologik va davlat ekspertizasidan o‘tkazish respublika byudjeti hisobidan amalga oshiriladi.