AQSh davlat departamenti Eronda o‘zini zo‘rlamoqchi bo‘lgan kishini o‘ldirgan qizning qatl etilishiga qarshi chiqdi. Departamentning bu boradagi bayonoti uning rasmiy saytida e’lon qilindi.
Departament sud jarayonining adolatli o‘tganiga jiddiy shubha bildirib, aybga iqror bo‘lish uchun ham bosim o‘tkazilgan bo‘lishi mumkinligini qayd etdi.
Eslatib o‘tamiz, Eronda 25-oktabr kuni 26 yoshli Reyhane Jabboriy ismli qiz, uning advokati ta’kidlashicha, o‘zini zo‘rlamoqchi bo‘lgan kishini o‘ldirgani uchun oliy jazo — osish yo‘li bilan qatl etilgan.
Reyhane qotillikni 2007-yilda, 19 yoshligida amalga oshirgan. Shuncha yil davomida u qamoqda saqlangan.
Islom respublikasi qonunlariga ko‘ra, marhumning oilasi afv etsagina qotilga nisbatan o‘lim jazosi bekor qilinishi mumkin. Biroq u afv etilmadi.