Janubiy Koreyaning Incheon shahrida o‘tkazilayotgan ParaOsiyo o‘yinlarida bugun, 24-oktabrda so‘nggi kun musobaqalari (sportning oltita turi bo‘yicha) bo‘lib o‘tadi, deb xabar bermoqda O‘zbekiston Milliy olimpiya qo‘mitasi.
E’tiborlisi, yengil atletikaning ertalabki dasturdan o‘rin egallagan yo‘nalishlari bo‘yicha o‘tkazilgan final bahslarida O‘zbekiston vakillari bittadan oltin, kumush va bronza medaliga sazovor bo‘ldilar.
Delegatsiyamiz hisobiga navbatdagi oltin medalni 400 metr masofaga yugurishda Faxriddin Hamroyev keltirdi. Belgilangan masofani 00:50.19 soniyada bosib o‘tgan mardonavor sportchimiz bir yo‘la ham Osiyo, ham ParaOsiyo o‘yinlari rekordini yangilashga muvaffaq bo‘ldi.
Shu tariqa, Faxriddin Hamroyev tomonidan mazkur ParaOsiyo o‘yinlarida qo‘lga kiritilgan oltin medallar soni to‘rttaga yetdi. Bunga qadar tajribali sportchimiz 200 metr, 800 metr va 4x100 metrga estafeta yugurish musobaqalarida shohsupaning eng yuqori pog‘onasiga ko‘tarilgan edi.
Ta’kidlash joizki, bunday ko‘rsatkichga suzish bo‘yicha bo‘lib o‘tgan musobaqalarda O‘zbekiston sharafini himoya qilgan Kirill Pankov ham ega.
Bugun o‘tkazilgan musobaqalarda kumush medalga Miran Saxadov sazovor bo‘ldi. Bunga qadar bittadan oltin va kumush medalni (4x100 metr va 200 metr masofaga yugurish) qo‘lga kiritgan Miran Saxadov bugun 400 metr masofaga (T11) yugurish musobaqasida 00:55.04 soniya natijani qayd etib, kumush medal sovrindori bo‘ldi.
ParaOsiyo o‘yinlarida 800 metr masofaga yugurish bo‘yicha bo‘lib o‘tgan musobaqada bronza medaliga sazovor bo‘lgan Sirojiddin Norov medallar kolleksiyasiga yana bir bronza medalini qo‘shib qo‘ydi. 1500 metr masofaga yugurish bo‘yicha o‘tkazilgan musobaqalarda hamyurtimiz belgilangan masofani 04:10.48 soniyada bosib o‘tdi.
Ayni paytga kelib O‘zbekiston delegatsiyasi hisobida 22 ta oltin, 5 ta kumush va 4 ta bronza medali mavjud.
Eslatib o‘tamiz, ParaOsiyo o‘yinlarida yengil atletikachilarimiz hozircha jami 15 ta (8 ta oltin, 4 ta kumush, 3 ta bronza) medalni, suzish musobaqalarida Kirill Pankov (4 ta) va Dmitriy Xorlin (3 ta) jami 7 ta oltin medalni, dzyudo ustalarimiz esa jami 9 ta medalni (7 ta oltin, 1 ta kumush, 1 ta bronza) qo‘lga kiritgan.