Rossiyalik rassom Pyotr Pavlinskiy Moskvadagi Serbskiy nomidagi ruhiy kasalliklar institutida o‘tkazgan aksiyasida o‘z qulog‘ining bir qismini kesib oldi, deb xabar bermoqda “Interfaks”.

Aksiya suratlarini rassomning hamfikri Oksana Shaligina o‘zining Facebook’dagi sahifasida e’lon qilgan. Suratlarda bino tomida o‘tirgan Pavlenskiy pichoq bilan qulog‘ini kesayotgani ko‘rsatilgan. Boshqa bir rasmda politsiya xodimlari rassomni qo‘lga olayotgani tasvirlangan.

Rassomning bayonotiga ko‘ra, bu aksiya psixiatriyaning siyosiy maqsadlarda ishlatilishiga qarshilik qilish uchun tashkil etilgan.

Pavlenskiy bungacha ham bir necha marta o‘z tana a’zolari orqali shunday qiliqlarni amalga oshirgani bilan tanilgan. Ruhiy kasalliklar shifoxonasiga bir necha marta topshirilganiga qaramay, shifokorlar uni har safar sog‘lom deb topgan.