AQSh hukumati tomonidan Afg‘oniston harbiy havo kuchlari uchun taxminan 500 million dollarga sotib olingan 20 ta harbiy-transport samolyotlarining 16 tasi afg‘on harbiylari tomonidan yo‘q qilindi. Uning qismlari esa temir-tersak sifatida har bir qadog‘i (409,5 gramm) olti sentdan sotilmoqda, deya xabar berdi “Rossiyskaya gazeta” FoxNews telekanaliga tayanib.
Gap shundaki, 2013-yilda AQSh mudofaa vazirligi tomonidan sotib olingan 20 ta samolyotdan iborat partiyada afg‘on harbiylari tomonidan nuqsonlar aniqlangan va ular yaroqsiz deb topilgan edi.
Samolyotlar biroz vaqt davomida Qobul xalqaro aeroportida parvoz yo‘lagini band qilib maqsadsiz turavergach, afg‘on harbiylari ularning 16 tasini temir-tersak sifatida sotishga qaror qilgan.
Bu AQShdagi Afg‘onistonni rekonstruksiya qilish bo‘yicha maxsus bosh inspeksiya tekshiruvlari chog‘ida aniqlangan. Inspeksiya rahbari bu boradagi hujjatlarni AQSh Harbiy havo kuchlariga taqdim etgan, ularning bunga qanday munosabat bildirgani noma’lum bo‘lib qolmoqda.
Izoh (0)