Oziq-ovqat mahsulotlariga qo‘yilgan embargoga qaramay, Yevropadan Rossiyaga keltirilgan 20 tonna atrofidagi go‘sht va ichak-chovoqlar dam olish kunlari Rossiya Federatsiyasi janubidagi Novorossiysk port-shahri yaqinida joylashgan poligonda yoqib yuborildi. Bu haqda “RIA Novosti” xabar bermoqda.
“Rosselxoznadzor” boshqarmasi vakili Yekaterina Chernitsovaning ma’lum qilishicha, go‘sht partiyasi Qrim yarimorolidan Novorossiyskka yuk avtomobilida 14-sentabr kuni keltirilgan.
Avtomobil tekshirilganda, unda rasman qayd etilgan “Qora dengizning muzlatilgan kilkasi”dan tashqari, xorijda ishlab chiqarilgan cho‘chqa va parranda ichak-chovoqlari topilgan. Haydovchida esa mazkur mahsulotlarni Rossiyaga olib kirishga ruxsat beruvchi kerakli hujjatlar bo‘lmagan.
Aniqlanishicha, ichak-chovoqlar Buyuk Britaniyadan, go‘sht esa Belgiyadan olib kelingan. Zarur hujjatlar taqdim etilmagani tufayli, “Rosselxoznadzor” boshqarmasi vakili so‘zlariga ko‘ra, “xavfli mahsulotlarni yo‘q qilish haqida qaror qabul qilingan”.
Barcha mahsulotlar Novorossiyskda joylashgan Glebovskoye qishlog‘idagi poligonda yoqib yuborildi. Xabar berilishicha, ayni damda Sankt-Peterburgga yo‘l olishi kerak bo‘lgan mazkur yukni jo‘natgan yoki qabul qilib olgan kishilarni javobgarlikka tortish masalasi ko‘rib chiqilmoqda.
Eslatib o‘tamiz, Rossiya prezidenti Vladimir Putin Rossiyaga qarshi iqtisodiy sanksiyalar joriy etgan mamlakatlar — AQSh, Yevroittifoq davlatlari, Kanada, Avstraliya va Norvegiyadan qishloq xo‘jaligi mahsulotlari, xomashyo va oziq-ovqat import qilishni taqiqlash to‘g‘risidagi farmonni joriy yilning 7-avgust kuni imzoladi. Farmonga binoan ushbu taqiq kuchga kirgan kunidan boshlab bir yil amalda bo‘ladi.
Izoh (0)