Yaponiya Adliya vaziri Midori Matsushima yig‘ilishga qizil sharf taqib kelib, parlament yuqori palatasining ishini 20 daqiqaga to‘xtatib qo‘ydi. Bu haqda Associated Press ma’lumotiga tayanib, RT kanali axborot xizmati xabar bermoqda.

Vazirning libosini to‘ldirib turgan qizil sharf muxolifatchi guruhlar g‘azabiga uchradi. Gap shundaki, Yaponiya parlamentida palatalar va qo‘mitalar yig‘ilishiga ustki kiyim — palto, shlyapa va sharf kiygan holda tashrif buyurish taqiqlangan. Bir necha o‘n yildan beri rioya qilib kelinayotgan mazkur dress-kodning buzilishi palata ishi to‘xtatilib, sharf so‘zi nimani anglatishini muhokama qilishga olib keldi. Bu orqali deputatlar vazirning qoida buzgan yoki buzmaganligini aniqlamoqchi bo‘ldi.

Qizil rangni xush ko‘ruvchi Midori Matsushima esa libosiga deputatlarning bu darajada e’tibor qaratganidan hayron bo‘lib, qoidabuzarlik qilmaganini aytdi. Uning fikricha, issiq tutuvchi sharflar bilan aksessuar vazifasini o‘tovchi sharflarni bir-biridan farqlash lozim. “Sharf — bu libosimning bir qismi bo‘lib, u har bir ayol uchun urfga rioya qilishida yordam beruvchi oddiy buyumdir”, — dedi Adliya vaziri.

Muhokama jarayonida deputatlar, shuningdek, sharf kim tomonidan ishlab chiqarilgani va mato sifati bilan qiziqdi. Keyinroq palata vakillaridan biri Yaponiya senatorlarining parlamentda sharf taqish borasida bir fikrga kela olmaganini ma’lum qildi.

Palata yig‘ilishini to‘g‘ridan-to‘g‘ri efirga uzatuvchi NHK telekanali bu vaqtda teletomoshabinlarga suv ostidagi qoya atrofida suzayotgan baliqlarni ko‘rsatishga majbur bo‘ldi.

Ma’lum qilinishicha, yuzaga kelgan vaziyat aholining noroziligiga sabab bo‘ldi.