O‘zbekiston Respublikasi Parvozlar xavfsizligini nazorat qilish davlat inspeksiyasi va Milliy xavfsizlik xizmatining birgalikdagi qarori bilan O‘zbekiston Respublikasining fuqaro aviatsiyasida radio, teleapparatura, audio va video texnika, kompyuter, planshet va mobil telefonlarni aviatsiya xavfsizligi bo‘yicha tekshirish qoidalari (pdf) tasdiqlandi.
“Mazkur Qoidalar talablari O‘zbekiston Respublikasining fuqaro aviatsiyasida ichki va xalqaro yo‘nalishlarda uchuvchi yo‘lovchilarning (havo kemasi ekipajining) yonida bo‘lgan elektron vositalarni aviatsiya xavfsizligi bo‘yicha tekshirishga nisbatan tatbiq etiladi”, — deyiladi hujjatda.
Agar O‘zbekiston Respublikasining xalqaro shartnomasida mazkur Qoidalarda nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.
Qoidalarda aniqlik kiritilishicha, elektron vositalarni aviatsiya xavfsizligi bo‘yicha tekshirish O‘zbekiston Milliy xavfsizlik xizmatining aviatsiya xavfsizligi bo‘linmalari xodimlari tomonidan aeroportdagi maxsus ajratilgan va zarur maxsus texnik vositalar bilan jihozlangan tekshirish xonasida amalga oshiriladi.
“Yo‘lovchi (havo kemasi ekipaji) aviatsiya xavfsizligi bo‘linmalari xodimlarining so‘roviga asosan tekshirish xonasida o‘zining elektron vositalarini yoqish orqali ishlashini, ularning akkumulyatorlari, batareyalari joylashtirilgan joylarini ko‘rsatishi shart. Elektron vositalarning ishlashini ularni yoqish orqali aniqlash imkoni bo‘lmasa, ular yo‘lovchi (havo kemasi ekipaji) tomonidan taqdim etilgan yoki tekshirish xonasidagi zaryadlash anjomlari orqali tekshirish uchun yetarli darajada quvvat olguniga qadar zaryadkaga qo‘yiladi”, — deya qayd etiladi hujjatda.
Agar tekshirish uchun yetarli darajada quvvatlangan elektron vosita yoqilmasa, mazkur elektron vosita aviatsiya xavfsizligi bo‘linmalarining xodimlari tomonidan qo‘shimcha maxsus texnik vositalarni qo‘llash orqali tekshiriladi.
Qoidalarda belgilab qo‘yilganidek, aviatsiya xavfsizligi bo‘linmalari xodimlari tomonidan yo‘lovchiga tegishli bo‘lgan va elektron vositalarda saqlanayotgan shaxsiy ma’lumotlarni tekshirish taqiqlanadi.
Elektron vositalarni aviatsiya xavfsizligi bo‘yicha tekshirish jarayonida ularda taqiqlangan xavfli moddalar va buyumlar mavjudligi aniqlansa, tekshirish to‘xtatiladi va yo‘lovchi havo kemasiga qo‘yilmaydi.
Izoh (0)