Yevropa Ittifoqi Erondan gaz importini yo‘lga qo‘yishga qiziqish bildirmoqda. Bu haqda “Ukrainskaya energetika”ga tayanib “Yevropeyskaya integratsiya” internet-nashri xabar bermoqda.

Ikki zarur shart − sanksiyalarning bekor qilinishi va gaz quvurlari infratuzilmasining qurib bitkazilishi masalalari Yevropa Ittifoqi rejalariga to‘siq bo‘lolmaydi, deb ma’lum qilgan Yevropa Komissiyasidagi manba. Eron Rossiya gaziga bog‘liqlikni kamaytirishga yordam beradigan o‘rta muddatli choralarning ustuvor qismidir. Eron gazi Yevropaga ancha oson kelishi mumkin, siyosiy jabhada esa Tehron va G‘arb o‘rtasida yaqqol yaqinlashuv ko‘zga tashlanmoqda, deyiladi manbada.

Gaz zahiralari bo‘yicha dunyoda Rossiyadan keyin ikkinchi o‘rinda turadigan Eron yadro dasturi bo‘yicha G‘arb bilan muzokaralarni inobatga olgan holda Yevropaga gaz yetkazib berish bo‘yicha yaxshi muqobil sifatida ko‘rilmoqda.