29-iyul, seshanba kuni Yevroittifoqqa a’zo 28 davlatning doimiy vakillari Bryusselda sanksiyalarning yangi to‘plami haqida kelishib oldi. Unga ko‘ra, Kremlni xalqaro jamoatchilikka quloq solishga va Ukraina sharqidagi ayirmachilarga yordam berishni to‘xtatishga majburlash zarur.
Euronews xabar berishicha, Yevropaning yetakchi davlatlari Rossiya davlat banklari uchun Yevroittifoq moliya bozorlarini yopib qo‘yishga kelishishdi. Bundan tashqari, Rossiyaga neft sanoati uchun uskunalar, texnika va elektronika eksporti cheklanadi.
Ekspertlar fikricha, cheklovlar Fransiyaga avvalgi shartnomalar bo‘yicha Rossiyaga “Mistral” vertolyot tashuvchilarini yetkazib berishga to‘sqinlik qilmaydi. Angela Merkel ham Rossiyani keragidan ortiq “qiynash”ni istamayapti: Germaniyada iste’mol qilinadigan neft mahsulotlari va gazning uchdan bir qismi Rossiyadan keltiriladi.
Sanksiyalar 31-iyuldan kuchga kirishi kutilmoqda, ular uch oydan so‘ng qayta ko‘rib chiqilishi mumkin.
Izoh (0)