AQSh Kongressi Vakillar palatasining Reglament qo‘mitasi kelasi hafta mamlakat prezidenti Barak Obamani xizmat vakolatini suiiste’mol qilgani uchun javobgarlikka tortish masalasini ovozga qo‘yish borasida kelishib oldi. Bu haqda 24-iyul, payshanba kuni Politico xabar berdi.
“Qonunlar – prezident o‘z xohishiga ko‘ra tanlab olishi mumkin bo‘lgan takliflar ro‘yxati emas”, — dedi qo‘mita raisi, respublikachilar partiyasi vakili Pit Seshns (Pete Sessions). Uning so‘zlariga ko‘ra, “tizim boshqacha ishlaydi”.
Manbaning so‘zlariga ko‘ra, Obama o‘z siyosatini farmonlar yordamida olib bormoqda. Xususan, prezident eng kam ish haqi miqdorini oshirish masalasida Kongress qo‘llab-quvvatloviga erisha olmaganidan so‘ng, bu haqdagi qarorni o‘zi mustaqil ravishda qabul qilgandi.
Agar Vakillar palatasi da’voni tasdiqlasa, u federal sudga yuboriladi va hujjatning yuridik kuchga ega-ega emasligini sud belgilaydi. Sudya ijobiy javob bergan taqdirda, talab Obamaning ma’muriyatiga yo‘naltiriladi. Ushbu jarayon bir necha oylarga cho‘zilishi mumkin.
Avvalroq, Demokratik partiyadan saylangan AQSh prezidenti Obama bilan Kongress Vakillar palatasi spikeri, Respublikachilar partiyasi a’zosi Jon Beyner (John Boehner) sudlashmoqchi ekanligi ma’lum bo‘lgandi. U davlat rahbarini xizmat vakolatini suiiste’mol qilayotgani va davlatning boshqa qonunlarini buzayotganlikda ayblagandi. O‘shanda siyosatchi uning da’vosi prezidentni impichment yoqasiga olib kelishga urinish emasligini ma’lum qilgandi.
O‘z navbatida, Oq uy matbuot kotibi Jon Ernestning ma’lum qilishicha, Obama qonunlarga rioya etadi, respublikachilar esa, uning fikricha, bor-yo‘g‘i prezidentning siyosatidan norozi bo‘lganliklari uchungina unga qarshi da’vo berishmoqchi.
Izoh (0)