Ukraina hududiga qulagan Malayziyaning “Boing”i yo‘lovchisi o‘zining Facebook’dagi sahifasiga samolyotning parvozdan oldingi suratini joylagan. Bu haqda “Rossiyskaya gazeta” xabar berdi.
“Mabodo u yo‘qolib qolsa, mana shunday ko‘rinishga ega bo‘lgan”, — deya rasmga izoh bergan Kor Pan ismli foydalanuvchi. Suratda aeroport kommunikatsiyalariga ulangan layner aks etgan, geolokatsiya ma’lumotlariga ko‘ra, fotosurat Sximxol aeroportida tushirilgan.
Ayni paytgacha rasm 17 mingdan ortiq marta bo‘lishilgan, unga 160 dan ortiq izoh yozilgan. Foydalanuvchilarning ko‘pchiligi hayotidagi so‘nggi suratni Facebook’ka joylagan yigitning qarindoshlari va yaqinlariga hamdardlik izhor etmoqda.
Eslatib o‘tamiz, “Boing-777” Toshkent vaqti bilan payshanba kuni 20:00 da Donetsk viloyati hududida halokatga uchradi. So‘nggi ma’lumotlarga ko‘ra, samolyot qulashi natijasida 298 kishi halok bo‘lgan.
Izoh (0)