Toshkent viloyati bojxona boshqarmasi xodimlari tomonidan huquqni muhofaza qiluvchi boshqa idoralar vakillari bilan hamkorlikda tilla buyumlarning noqonuniy olib o‘tilishi bilan bog‘liq bir nechta qonunbuzarlik holatlariga nuqta qo‘yildi. Bu haqda Toshkent viloyati bojxona boshqarmasi axborot xizmati xabar berdi.
“G‘ishtko‘prik” bojxona kompleksida piyoda kelayotgan fuqaro X. X.ning bezovtalanishi ziyrak bojxonachilarda shubha uyg‘otdi. Ushbu shaxs xolislar ishtirokida shaxsiy ko‘rikdan o‘tkazilganda, oyog‘iga kiyib olgan maxsisi ichida sellofan xaltacha yashirilgani aniqlandi. Fuqaro X. X. qiymati salkam 7,4 million so‘mlik 73,47 gramm og‘irlikdagi tilla taqinchoqlarni hech qanday hujjatlarsiz, noqonuniy ravishda xaltacha orqali olib o‘tishga uringani fosh bo‘ldi.
Xuddi shu bojxona kompleksi orqali qo‘shni davlatdan kirib kelayotgan piyodalardan biri D. M. ham shaxsiy ko‘rikdan o‘tkazilganda, u qo‘l sumkasi va kiyimlari orasiga 22 dona zargarlik buyumlarini yashirgani ma’lum bo‘ldi. Qiymati salkam 14 million so‘mlik tilla taqinchoqlarning og‘irligi 125,74 grammni tashkil qildi.
Shuningdek, mazkur postda o‘rnatilgan tartibda shaxsiy ko‘rikdan o‘tkazilgan farg‘onalik U. A.ning qiymati salkam 5 million so‘mlik 43,64 gramm og‘irlikdagi tilla buyumlarni bojxona bayonnomasida qayd etishni “unutib” qo‘ygani aniqlandi.
“G‘ishtko‘prik” bojxona chegarasini kesib o‘tish vaqtida nukuslik A. A. 197,54 gramm og‘irlikdagi zargarlik buyumlari haqida T-6 bojxona bayonnomasida ham, xodimlarning og‘zaki so‘rovi paytida ham ma’lum qilmadi. U qiymati salkam 20 million so‘mlik 64 turdagi taqinchoqlarni egnidagi kiyimlari orasiga berkitgani ma’lum bo‘ldi.
Hozirda ushbu holatlar yuzasidan bojxona surishtiruv ishlari davom etmoqda.
Eslatib o‘tamiz, jismoniy shaxslar tomonidan O‘zbekiston Respublikasi hududiga aksiz solig‘i solinmaydigan tovarlarni olib kirishning chegaralangan me’yorlariga muvofiq jismoniy shaxslarga O‘zbekistonga kirayotganda aksiz solig‘ini to‘lamasdan umumiy og‘irligi 30 grammdan oshmaydigan qimmatbaho metall va toshlardan yasalgan beshta zargarlik buyumini olib kirishga ruxsat beriladi.
Belgilangan me’yordan ortiqcha olib kirilgan tilla buyumlari uchun esa o‘rnatilgan tartibda bojxona to‘lovlari undiriladi.