8-iyul, seshanba kuni Braziliyaning San-Paulu shtati politsiyasi braziliyalik futbol afsonasi Pelening o‘g‘lini qo‘lga oldi, deya xabar berdi “ITAR-TASS” mahalliy OAVlar ma’lumotiga asoslanib.
Edino deb tanilgan Pelening 43 yoshli o‘g‘li Edson Sholbi Nasimentuning qochib ketishidan xavotirlangan Braziliya hukumati uni uyida qo‘lga olib, politsiya uchastkasiga olib ketdi.
Avval xabar berilganidek, Edino joriy yilning may oyi oxirlarida giyohvand moddalar savdosi bilan shug‘ullangani uchun 33 yillik qamoq jazosiga hukm qilingan edi. “Santos” jamoasining sobiq darvozaboni bo‘lgan Edino o‘ziga qo‘yilgan barcha ayblarni rad etib, “faqatgina” giyohvand modda iste’mol qilganini aytgan.
Giyohvand moddalar savdosida sobiq darvozabon bilan birgalikda yana uch kishi ayblanib, ularning barcha mol-mulki, xususan, 100 ga yaqin avtomobili musodara qilinib, qamoq jazosiga hukm qilingan.
Sud hukmidan norozi bo‘lgach, Edino apellyatsiyaga bergan va ish qayta ko‘rib chiqilgunga qadar ozodlikda bo‘lgan.