Fransiyaning sobiq prezidenti Nikolya Sarkozi fransuz politsiyasining Nanter shahridagi korrupsiyaga qarshi kurash bo‘limi tomonidan hibsga olindi. Bunday holat — Fransiya prezidentining hibsga olinishi mamlakat tarixida ilk bor kuzatilmoqda, deb xabar berdi ITAR-TASS.
Hozirda Sarkozi o‘z maqsadlariga erishish uchun mansabdor shaxsga ta’sir o‘tkazishda ayblanmoqda. Agar aybi tasdiqlansa, unga 3 yillik qamoq jazosi hamda 375 000 yevro jarima belgilanadi.
Muammar Qaddafiy 2011-yil Sarkozining 2007-yilgi saylovoldi kampaniyasini moliyalashtirgani haqida intervyu bergan. 2014-yil boshida mazkur videolavha France 3 telekanalida namoyish etilgach, Sarkoziga qarshi ish qo‘zg‘atildi.
Muammar Qaddafiyning o‘g‘li Seyf al-Islam Qaddafiy moliyalashtirish haqiqatan ham Liviya tomonidan amalga oshirilganini tasdiqladi. U bank hisob raqamlarini ochish, pul o‘tkazishga doir barcha hujjatlarni dalil sifatida taqdim etishi mumkinligini ta’kidlab o‘tgan.
Mazkur ishyuzasidan sobiq prezidentning telefoni kuzatilganida unga daxldor boshqa ma’lumotlar ham topildi.
Saylovoldi kampaniyasini tashkillashtirishda milliarder Lillian Betankurning yordami ham borligi gumon qilingan edi. Ma’lum bo‘lishicha, sobiq prezident bu ish yuzasidan shug‘ullangan sudya bilan telefon orqali bog‘langan. U o‘zining aybsizligi e’lon qilinishi evaziga sudyaga Monakoda yuqori lavozim taklif qilgan.
Izoh (0)