Mart oyida yo‘qolib qolgan Malayziyaning “Boing”i yo‘lovchilari oila a’zolariga 50 ming dollar miqdorida tovon puli berilishi boshlandi. Bu haqda Reuters xabar berdi.
Malayziya tashqi ishlar vaziri o‘rinbosari Hamza Zaynudin ma’lum qilishicha, Malayziyadagi olti oila va Xitoydagi bir oila sug‘urta to‘loviga allaqachon murojaat qilishgan.
Uning aytishicha, yo‘lovchilar oilalari hozirgi tovon pulidan uch barobar ko‘p to‘lovni talab qilishlari mumkin. Biroq oshirilgan tovon puli layner qidiruvi to‘xtagani haqida rasman e’lon qilinganidan keyingina to‘lanishi mumkin.
Ayni paytda Xitoyning Zhu Kezhen tadqiqot kemasi okean qa’rida qidiruv olib borishga tayyorlanmoqda. Qutqaruvchilar okean tubidagi xaritaga kiritlmagan 60 ming km² maydonni qidirib chiqmoqchi.
Eslatib o‘tamiz, Malaysia Airlines’ga qarashli Boeing 777-200ER samolyoti 8-mart kuni Kuala-Lumpurdan Pekinga parvoz etayotib, radarlardan yo‘qolib qolgan. U Malayziya va Vyetnam chegarasini kesib o‘tganidan keyin bir necha daqiqa vaqt o‘tgach, aloqa uzilgan. Bevosita g‘oyib bo‘lishidan avval undan olingan xabarda biror muammo haqida gap ham bo‘lmagan. Samolyot bortida 12 nafar ekipaj a’zolari bilan birga jami 239 kishi bo‘lgan.
Izoh (0)