Mo‘g‘iliston poytaxti Ulan-Bator shahrida erkin, yunon-rum va ayollar kurashi bo‘yicha o‘smirlar o‘rtasida o‘tkazilayotgan Osiyo chempionatida o‘zbekistonlik uch nafar sportchi sovrindorlar safidan o‘rin egalladi. Bu haqda O‘zbekiston Milliy Olimpiya qo‘mitasi matbuot xizmati xabar berdi.
Yunon-rum kurashi bo‘yicha o‘tkazilgan musobaqalarda O‘zbekiston terma jamoasi a’zosi Islom Bahromov vazni 50 kilogrammgacha bo‘lgan polvonlar bellashuvida barcha raqiblarini mag‘lub etib, Osiyo chempionatining oltin medaliga sazovor bo‘ldi.
Ushbu vazn toifasida hindistonlik Anil Anil kumush medal sovrindori bo‘lgan bo‘lsa, Shimoliy Koreyalik Nam Kvon hamda eronlik Reza Xeyrolloh Nerdi bronza medali bilan taqdirlandi.
Yunon-rum kurashi bo‘yicha eng og‘ir — 120 kilogramm vazn toifasida gilamga tushgan o‘zbekistonlik Daler Rahmatov esa bronza medali bilan taqdirlandi. Ushbu vaznda Janubiy Koreya vakili Shak Li Sung birinchi, xitoylik Bin Liu ikkinchi o‘rinni egalladi. Osiyo chempionatining yana bir bronza medali eronlik Babak Gasem Razmpushga nasib etdi.
Shuningdek, qo‘mita ma’lumotiga ko‘ra, ayollar kurashi bo‘yicha bo‘lib o‘tgan musobaqalarda O‘zbekiston sharafini himoya qilgan Zuhra Otamurodova (-44 kg) finalga qadar kechgan bellashuvlarni g‘alaba bilan yakunlab, kumush medal sohibi bo‘ldi.
Ushbu vazn toifasida Jin Xyang Pak (KNDR) birinchi o‘rinni egallagan bo‘lsa, Battogtox Lxagva (Mo‘g‘iliston) va Elvira Abilkairova (Qozog‘iston) uchinchi o‘rinni band etdi.
Izoh (0)