O‘tgan hafta mobaynida O‘zbekiston hududida 216 ta yong‘in sodir bo‘lgani qayd etilgan. Turli sabablarga ko‘ra sodir bo‘lgan yong‘inlarda 2 nafar fuqaro tan jarohatlari olgan. Bu haqda O‘zbekiston Respublikasi Ichki ishlar vazirligi matbuot xizmati xabar berdi.
Toshkent shahar Mirobod tumanida joylashgan 4-sonli shahar klinik shifoxonasida yong‘in sodir bo‘lib, qayta ta’mirlanayotgan shifoxona binosining 650 kvadrat metr maydonida tom qismi yongan. Yong‘in gaz payvandlash ishlarini olib borish vaqtida yong‘in xavfsizligi qoidalariga rioya etilmasligi natijasida sodir bo‘lgan.
Toshkent shahar Mirobod tumanida joylashgan maktabgacha ta’lim muassasasida elektr simlarining qisqa tutashuvi natijasida yong‘in sodir bo‘lib, binoning 15 kvadrat metr maydonida tom qismi yonib zararlangan. Yong‘in vaqtida bino ichida bo‘lgan 63 nafar tarbiyalanuvchi va 18 nafar tarbiyachi o‘t o‘chiruvchilar tomonidan qutqarilgan.
Toshkent viloyati Yangiyo‘l tumanidagi mebel ishlab chiqarish sexida yong‘in sodir bo‘ldi. Sexdagi havo almashtirish tizimining elektr simlarida sodir bo‘lgan qisqa tutashuv natijasida yong‘in kelib chiqqan va yong‘in natijasida 300 kvadrat metr maydondagi ishlab chiqarish xonalari, asbob-uskunalar va jihozlar yongan.
Mamlakat bo‘yicha sodir bo‘lgan barcha yong‘inlardan qariyb 649 million so‘m miqdorida qurilish materiallari va 730,5 million so‘mlikdan ortiq moddiy boyliklar saqlab qolingan.
Izoh (0)