Rossiya, Belorussiya va Qozog‘iston Yevrosiyo ittifoqini tuzadi
Rossiya, Belorussiya va Qozog‘iston yetakchilari Yevrosiyo iqtisodiy ittifoqi haqidagi shartnomani imzolamoqchi, u 2015-yil 1-yanvardan kuchga kiradi. Bu haqda Kreml matbuot xizmati tarqatgan ma’lumotga asoslanib, Vesti.ru xabar berdi.
“Ittifoqning tuzilishi ishtirokchi mamlakatlarni integratsiyaning yanada yuqori darajasiga chiqaradi”, — deb hisoblaydi Moskva. Uch davlat mahsulotlar, xizmatlar, kapitallar va ish kuchining ittifoq doirasida erkin o‘tib yurishini kafolatlash mas’uliyatini oladi.
Rossiya, Belorussiya va Qozog‘iston energetika, sanoat, qishloq xo‘jaligi va transport sohalarida bahamjihat siyosat olib bormoqchi.
“Shu tariqa, MDH hududida eng yirik umumiy bozor shakllanadi, u iqtisodiy taraqqiyotning yangi kuchli markaziga aylanadi”, — deyiladi xabarda.
Ushbu bitim Oliy Yevrosiyo iqtisodiy kengashining 29-may kuni bo‘lib o‘tadigan navbatdagi majlisida imzolanishi rejalashtirilmoqda.
