O‘zbekiston Avtomobil va daryo transporti agentligi boshlig‘ining buyrug‘i bilan Avtomobilda tashuvchi tomonidan haydovchilarga yo‘l harakati xavfsizligi masalalari bo‘yicha yo‘l-yo‘riqlar berish tartibi to‘g‘risidagi nizom tasdiqlandi.
Yo‘lovchi, yuk, bagaj tashish xizmatini ko‘rsatadigan yuridik shaxs haydovchilarga quyidagi turdagi yo‘l-yo‘riqlar ko‘rsatilishini ta’minlashi shart:
- dastlabki – ishga qabul qilishda;
- reys oldi – yo‘nalishga chiqish oldidan;
- maxsus – muayyan mavzu bo‘yicha;
- mavsumiy – bahorgi-yozgi va kuzgi-qishki mavsumlardan oldin;
- navbatdan tashqari – haydovchilarga alohida shart-sharoitlar bo‘yicha qo‘shimcha ma’lumot va talablarni yetkazish zarur bo‘lganda.
Yo‘l-yo‘riqlar berishning to‘g‘ri va to‘liq hajmda tashkil etilishi uchun mas’uliyat bevosita avtomobilda tashuvchining rahbari zimmasiga yuklatiladi.
Tegishli yil uchun yo‘l-yo‘riqlarning turi, mazmuni, berish vaqti, joyi va yo‘l-yo‘riq berish vazifasi yuklatiladigan shaxslar ro‘yxati YHX xizmati tomonidan ishlab chiqiladi va avtomobilda tashuvchining rahbari tomonidan tasdiqlanadi.