Futzal bo‘yicha XIII Osiyo chempionatining bronza medallarini qo‘lga kiritgan O‘zbekiston terma jamoasi a’zolari 20-may kuni O‘zbekiston futzal uyushmasi tomonidan pul mukofotlari bilan taqdirlandi. Bu haqda O‘zbekiston futbol federatsiyasi xabar berdi.
Vyetnamning Xoshimin shahrida bo‘lib o‘tgan Osiyo chempionatida muvaffaqiyatli ishtirok etgan O‘zbekiston terma jamoasi a’zolariga murojaat qilgan O‘zbekiston futzal uyushmasi prezidenti Fazliddin Sirojiddinov shunday dedi: “Birinchi navbatda, barchangizga chuqur minnatdorchilik bildirmoqchiman. Siz Osiyo chempionati kabi nufuzli musobaqada O‘zbekiston sharafini munosib himoya qila oldingiz. Umid qilamanki, keyingi Osiyo chempionatida ham siz sovrindorlar qatoridan joy olib, Jahon chempionati yo‘llanmasini qo‘lga kiritasiz”.
Futzalni rivojlantirish, hamda futzal bo‘yicha milliy terma jamoa obro‘sini yanada oshirish maqsadida, O‘zbekiston futzal uyushmasi bundan buyon terma jamoa a’zolariga oylik maosh to‘laydigan bo‘ldi.
“Biz O‘zbekiston futbol federatsiyasi hamda O‘zbekiston futzal uyushmasi rahbariyati bilan kelishib, sizlarga, ya’ni terma jamoa a’zolariga oylik maoshlarini ta’sis etishga qaror qildik. Endilikda, milliy terma jamoa a’zolari har oy O‘zbekiston futzal uyushmasi tomondan oylik maoshlarini oladi, bu esa, terma jamoada o‘ynash ishtiyoqini yanada oshiradi”, — deb ta’kidladi Fazliddin Sirojiddinov.
Izoh (0)