“Kamolot” yoshlar ijtimoiy harakati markaziy kengashi tomonidan Oliy va o‘rta maxsus ta’lim, Madaniyat va sport ishlari, Ichki ishlar, Sog‘liqni saqlash vazirliklari, O‘zbekiston futbol federatsiyasi bilan hamkorlikda futbol bo‘yicha an’anaviy “Kamolot” kubogi” respublika turniri tashkil etildi. Bu haqda O‘zA xabar beradi.
Musobaqaning mintaqaviy bosqichlari shu yilning 20-apreliga qadar o‘tkazildi. Unda g‘oliblikni qo‘lga kiritgan jamoalar musobaqaning yakuniy uchrashuvlarida o‘zaro kuch sinashdi.
“Paxtakor” markaziy stadionida Mirzo Ulug‘bek nomidagi O‘zbekiston Milliy universiteti va O‘zbekiston davlat jismoniy tarbiya instituti (O‘zDJTI) jamoalari o‘rtasida turnirning final uchrashuvi bo‘lib o‘tdi.
– Turnirning mintaqaviy saralash bosqichlarida mamlakatimizdagi barcha oliy o‘quv yurtlaridan 4500 nafardan ziyod talaba ishtirok etdi, – deydi O‘zDJTI jamoasi murabbiyi Muhiddin Nurmatov. – Jamoamizning musobaqalardagi g‘alabali odimlarida Bahodir Yusupov, Pavel Chulkin, Aleksandr Chikmaryov kabi talabalarimizning hissasi katta.
Qizg‘in va murosasiz uchrashuvda O‘zbekiston davlat jismoniy tarbiya instituti jamoasi 2:1 hisobida g‘alaba qozondi va “‘Kamolot’ kubogi”ni qo‘lga kiritdi.
– Kubok sohibiga aylanganimizdan juda xursandmiz, – deydi O‘zDJTI talabasi Abdumajid Malikov. – Turnir davomida hech bir g‘alabaga osonlikcha erishilgani yo‘q. Ayniqsa, final uchrashuvida stadionga yig‘ilgan ko‘p ming sonli ishqibozlarning ko‘z o‘ngida to‘p surish har bir o‘yinchini hayajonga soldi. Biroq jamoamizdagi ruhiy tayyorgarlik, o‘zaro hamjihatlik, g‘alabaga bo‘lgan ishonch bizni yuksak marra tomon yetakladi.
Izoh (0)