O‘zbekiston Respublikasi Vazirlar Mahkamasi 2011-yil 8-sentabrdagi “Davlat pensiyalarini tayinlash va to‘lash tartibini yanada takomillashtirishga yo‘naltirilgan normativ-huquqiy hujjatlarni tasdiqlash to‘g‘risida”gi qaroriga o‘zgartirish va qo‘shimchalar kiritdi. Bu haqda Norma.uz xabar berdi.
Hujjatga ko‘ra, bolalikdan nogironni 8 yoshigacha tarbiyalagan onaga pensiya belgilashda, talab qilinadigan 20 yillik ish stajiga quyidagilar qo‘shilmaydi:
-oliy ta’lim muassasalari, aspirantura, doktorantura va klinik ordinaturada, jumladan chet elda o‘qish;
-farzandi uch yoshga to‘lgunicha olinadigan ta’tilda bo‘lish;
-ofitserlik tarkibidagi shaxslar, praporshiklar, michmanlarning xotinlari o‘z erlari bilan ularning mehnat qilish imkoni bo‘lmagan hududlarda yashagan vaqti.
Nashrning eslatishicha, avval ushbu davr ish stajiga qo‘shilgan.
Bundan tashqari, I guruh nogironiga yoki 80 yoshga to‘lgan keksalarga qarab turishning haqiqiy holatlarini tekshirish dalolatnomalarini rasmiylashtirishning davriyligi har 12 oyga belgilanadi. Qarab turishning haqiqiy holatlarini tekshirish dalolatnomalari I guruh nogironi yoki 80 yoshga to‘lgan keksalarning pensiya ishiga tikib qo‘yiladi va qarab turgan shaxsga pensiya tayinlashda ish stajiga kiritish uchun asos hisoblanadi.
2014-yil 1-yanvaridan boshlab fuqarolik-huquqiy tusdagi shartnoma bo‘yicha ishlaydigan va qonun hujjatlari bilan belgilangan yoshga doir pensiyalarning minimal miqdoridan past daromad oladigan pensionerlarga pensiya to‘liq miqdorda to‘lanadi.
Hujjatda boshqa o‘zgartirish va qo‘shimchalar ham sanab o‘tilgan.
Izoh (0)