Samarqand shahrida tennis bo‘yicha ATP-Challenger turkumiga kiruvchi, sovrin jamg‘armasi 50 ming AQSh dollaridan iborat turnir o‘zbekistonlik raketka ustasining g‘alabasi bilan yakunlandi, deb xabar bermoqda “Olamsport”.
O‘zbekistonning ikkinchi raqamli tennischisi Farrux Do‘stov hal qiluvchi final uchrashuvida rossiyalik Aslan Karatsevni mag‘lubiyatga uchratdi. Uchrashuv 1 soatu 29 daqiqa davom etdi.
Farrux Do‘stov xalqaro turnir g‘olibi bo‘lish bilan birga 7200 AQSh dollari miqdoridagi mukofotga ham sazovor bo‘ldi. Mazkur g‘alaba 22-may kuni 28 yoshni qarshilaydigan Do‘stov uchun ajoyib sovg‘a bo‘ldi, deb yozadi “Olamsport”.
Ta’kidlash joiz, bu Do‘stov faoliyatidagi Challenger turkumida qo‘lga kiritilgan uchinchi titul bo‘ldi.
Eslatib o‘tamiz, ushbu turnirda O‘zbekistonning birinchi raqamli tennischisi Denis Istomin ham ishtirok etgan edi. Afsuski, dunyo reytingida kuchli 60 talikda borayotgan Istomin ikkinchi davrada gollandiyalik Boy Vesterxoffga imkoniyatni boy berib, musobaqani tark etdi.
Izoh (0)