Turkiyaning Manisa provinsiyasidagi ko‘mir konida sodir bo‘lgan halokat qurbonlari soni 274 taga yetdi. Bu haqda 14-may kuni Turkiya energetika va tabiiy manbalar vaziri Taner Yulduz bayonotiga tayanib, “ITAR-TASS” xabar berdi.
Vazirning ta’kidlashicha, konda hali ham yong‘in davom etmoqda. “Quyuq is gazi tufayli qutqaruv ishlari qiyinchilik bilan amalga oshirilmoqda”, — dedi u.
80 dan oshiq ishchi va qutqaruvchilar is gazidan zaharlanish belgilari bilan shifoxonaga yotqizildi.
Halokat Istanbuldan 250 kilometr janubda joylashgan Soma aholi punktida ikki kilometr chuqurlikda ro‘y berdi. Dastlabki ma’lumotlarga ko‘ra, kon qulashiga qisqa tutashuv sabab bo‘lgan. Natijada yong‘in chiqib, transformator stansiyasi portlab ketgan.
Avvalroq ko‘mir koni portlashi natijasida halok bo‘lganlar soni 201 taga yetgani xabar berilgan edi. Taner Yulduz so‘zlariga ko‘ra, halokat chog‘ida konda 787 nafar ishchi bo‘lgan.
Izoh (0)