Wikileaks informatori Bredli Menning tez orada harbiy turmadan oddiy qamoqxonaga o‘tkazilishi mumkin. Ushbu qarorni qabul qilishga tayyor turgan Pentagon, o‘z jinsi va ismini o‘zgartirgan Menning bu yerda zarur bo‘lgan tibbiy yordamni qabul qila olmaydi, deb hisoblaydi.
Associated Press yozishicha, AQSh mudofaa vaziri Chak Xeyglning o‘zi bunga rozilik bergan. Qaror hali rasman tasdiqlanmagan bo‘lsa-da, barcha yuridik masalalar hal qilingach, amalga oshadi.
Oddiy askar Bredli Menning Wikileaks saytiga “o‘ta maxfiy” muhri tushirilgan videoyozuvni berib yuborgan. Ushbu plyonkada amerikalik harbiylarning tinch iroqliklarni otib tashlagani aks etgan. Natijada Menning 35 yillik qamoq jazosiga hukm qilingan.
Hukm o‘qilganidan keyin Wikileaks informatori jinsini va ismini (Bredlidan Chelsiga) o‘zgartirish niyatini ma’lum qilgan. Sud aprelda unga ruxsat bergan.
Menningning xohishi noodatiy vaziyatni yuzaga keltirdi: qonunga ko‘ra, transgenderlar AQSh armiyasida xizmat qila olmaydi, shu sababli Pentagon ularga tegishli tibbiy yordam ko‘rsata olmaydi.
Izoh (0)