AQShning Kaliforniya shtati Beykersfild shahrida mushuk to‘rt yoshli bolani itning hujumidan saqlab qoldi. Ushbu hodisa xavfsizlik tizimi videokameralari orqali yozib olingan, deya xabar berdi 23ABC.
Yozuvdan ma’lum bo‘lishicha, bolakay hovlida velosiped uchayotgan vaqtida qo‘shni uydan labrador zotli it pisib kelgan va uni tishlab sudrab ketmoqchi bo‘lgan. Biroq kadrda to‘satdan Tara laqabli mushuk paydo bo‘lib, itga tashlangan. Dovdirab qolgan it bolaning oyog‘ini qo‘yib yuborib, qochib qolgan. Mushuk biroz vaqt itning ketidan qarab turgan, so‘ng bolaning yoniga qaytgan.
Bolaning onasi ham hovlida bo‘lgan va birdan uning yoniga shoshilgan. Ona biroz vaqt uy atrofida izg‘ib yurgan itni quvishga harakat qilgan, jonivor uni ham tishlab olgan.
Bolakayni shifoxonaga keltirishdi, uning jarohatiga o‘nta chok tushdi. Sakkiz oylik labradorning egalari esa itni tinchlantirishga va’da berishdi.
Izoh (0)