“O‘zbeknavo” estrada birlashmasining yangi tartibiga ko‘ra, har bir yangi ijodkor, o‘z faoliyati uchun litsenziya olishidan avval “O‘zbeknavo” estrada birlashmasi qoshidagi “Ijodiy ko‘maklashish” guruhining badiiy kengashidan o‘tadi. Asosiy talab va qoida — xonandalar jonli ijroda kuylashi zarur. Bu haqda “Sayyod” xabar berdi.

O‘zbeknavo matbuot kotibining ma’lumotlariga ko‘ra, 2014-yilning 6-may kuni o‘tkazilgan kengashda ishtirok etgan 67 nafar talabgorning 57 nafari  imtihondan “yiqildi”. Ularga litsenziya olish uchun rad javobi berildi. Faqatgina 10 nafari litsenziyaga loyiq deb topilib, ijodini boshlashiga ruxsat berildi.

“Endilikda istagan odam xonanda bo‘la olmaydi. “O‘zbeknavo” qoshidagi badiiy kengash litsenziya berish uchun o‘z tavsiyasini bildirishda, talabgorning nafaqat jonli ijrosi, balki kuylash mahorati, kiyinish madaniyatidan to o‘zini tutishigacha e’tibor qaratadi”, — deyiladi xabarda.