Farg‘ona viloyatining shahar va tumanlarida “Kamolot” yoshlar ijtimoiy harakati tomonidan O‘zbekiston mustaqilligining 23 yilligiga bag‘ishlab “Biz – buyuk yurt farzandlarimiz!” shiori ostida yoshlar festivali o‘tkazilmoqda, deb xabar beradi O‘zA.
Bag‘dod tumanida tashkil etilgan tadbirda “Kamolot” yetakchilari va faollari, o‘quvchi va talabalar, turli sohalarda mehnat qilayotgan yoshlar ishtirok etdi. “Kamolot” yoshlar ijtimoiy harakati Bag‘dod tumani kengashiga Prezident sovg‘asi – Isuzu avtobusi topshirildi.
Festival doirasida o‘tkazilgan “Ommaviy tahdidlar va yoshlar ma’naviyati”, “Siz sevgan qahramonlar”, “Biz sog‘lom turmush tarzi tarafdorimiz”, “Deputat va yoshlar” kabi loyihalarda deputatlar, olimlar, adiblar, san’atkorlar, sport ustalari yoshlar bilan muloqotda bo‘ldi. O‘zbekistonning mustaqil taraqqiyot yo‘li, barcha sohalarda erishilayotgan yutuqlar, yoshlarga oid davlat siyosati, shuningdek, “ommaviy madaniyat”ning asl maqsad-mohiyati va uning milliy ma’naviyatimizga ta’siri haqida fikr almashildi.
– Prezidentimiz tomonidan ilgari surilgan “Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi”da jamoat tashkilotlarining faolligini oshirishga alohida e’tibor qaratilgan, – deydi “Kamolot” yoshlar ijtimoiy harakati Bag‘dod tumani kengashi raisi M. Yusupov. – Konsepsiyaning mazmun-mohiyatini yoshlar orasida keng targ‘ib etish ularda el-yurt taqdiriga daxldorlik tuyg‘usini yanada kuchaytirishda muhim ahamiyatga ega.
Festivalda Vatan, tinchlik va yoshlikni madh etuvchi kuy-qo‘shiqlar yangradi.
Izoh (0)