Termizda “Yuksak ma’naviyatli avlod” festivali viloyat bosqichi o‘tkazildi

Termiz shahrida “Yuksak ma’naviyatli avlod” festivalining Surxondaryo viloyati bosqichi bo‘lib o‘tdi, deb xabar berdi O‘zA.

Tadbir Respublika Ma’naviyat targ‘ibot markazi, Oliy va o‘rta maxsus, Xalq ta’limi vazirliklari, O‘zbekiston Badiiy akademiyasi va “Kamolot” yoshlar ijtimoiy harakati markaziy kengashi hamkorligida tashkil etildi.

– Ilk bor o‘tkazilayotgan festivalning shahar va tuman bosqichlarida to‘rt yarim mingdan ortiq yosh qatnashdi, – deydi Respublika Ma’naviyat targ‘ibot markazi viloyat bo‘limi rahbari Muhammad Azimov. – Viloyat bosqichida uch yuzga yaqin yosh o‘z bilim va intellektual salohiyatini sinovdan o‘tkazdi.

Joriy yildan boshlab “Umid nihollari”, “Barkamol avlod” va Universiada sport musobaqalari oldidan o‘tkazilishi yo‘lga qo‘yilgan mazkur festivalda 14 yoshdan 25 yoshgacha bo‘lgan iqtidorli yigit-qizlar “Prezident asarlari bilimdoni”, “Eng yangi tarix bilimdoni”, “O‘z asarida milliylikni aks ettirgan rassom”, “O‘z asarida milliylikni aks ettirgan dizayner”, “Vatan kuychisi”, “Eng iqtidorli hunarmand”, “Badiiy ijod” nominatsiyalari bo‘yicha bahslashdi.

– Yog‘och chiqindilariga qayta ishlov berish orqali bolajonlar uchun stulcha va boshqa uy-ro‘zg‘or buyumlari yasashga qiziqaman, – deydi Sho‘rchi tumanidagi 9-umumta’lim maktabining 7-sinf o‘quvchisi Dilshod Karimov. – Darsdan bo‘sh vaqtlarimda maktabimizdagi hunarmandchilik to‘garagida soha sirlarini yanada chuqurroq o‘rganmoqdaman.

G‘oliblar festival tashkilotchilarining maxsus diplom va esdalik sovg‘alari bilan taqdirlandi. Ular endi festivalning mamlakat bosqichida ishtirok etadi.