AQSh Suriyada qurolli harakatlar olib borayotgan muxolifatga qo‘shimcha 27 million dollar ajratadi. Shu tariqa, Oq uy ma’muriyati tomonidan 2011-yildan buyon suriyalik qo‘zg‘olonchilarga ajratilgan mablag‘ning umumiy miqdori 287 million dollarni tashkil etdi. Bundan tashqari, AQSh Vashingtondagi Suriya muxolifati vakolatxonasining maqomini oshirdi, deb xabar berdi “Vesti”.
Endilikda Suriyalik qo‘zg‘olonchilar vakilligi Amerika qonunchiligiga muvofiq “xorijiy missiya” deya nomlanadi.
Maqomning bunday oshirilishi ramziy ma’noga ega. Biroq suriyalik muxolifat vakillari bu narsa ularning Vashingtondagi holatiga ijobiy ta’sir ko‘rsatib, amerikalik amaldorlarning ularga bo‘lgan ishonchini oshiradi, deb hisoblamoqda.
Bu orada Suriya prezidentlik saylovlariga tayyorgarlik ko‘rmoqda. Suriya prezidentligi uchun uch nafar nomzod, shu jumladan, mamlakatning amaldagi rahbari Bashar Asad ham kurash olib bormoqda. Shuningdek, Oliy konstitutsion sud ikki nafar muxolifat vakiliga ham saylovda o‘z nomzodlarini qo‘yishga ruxsat berdi. Bular Ma’muriy rivojlanish bo‘yicha vazir Maxer Xadjar va sobiq davlat vaziri va biznesmen Xasan al-Nuri.
Izoh (0)