O‘zbekiston aholi umri davomiyligi bo‘yicha Markaziy Osiyoda eng yuqori ko‘rsatkichni qayd etdi. Bu haqda Tengrinews.kz xabar bermoqda.
Umr davomiyligi bo‘yicha 2014-yilgi reyting AQSh Markaziy razvedka boshqarmasi (MRB) tomonidan tayyorlangan bo‘lib, u 223 mamlakatni qamrab olgan. Reytingda Monako peshqadam — bu mitti mamlakatda odamlar o‘rtacha 89,57 yil umr ko‘radi.
Ikkinchi o‘rindan boshqa bir mitti mamlakat — Makao (84,48 yosh) joy olgan bo‘lsa, uchinchi o‘rin Yaponiyaga (84,46 yosh) nasib etgan. Reytingning kuchli o‘nligidan Singapur (84,38 yosh), San-Marino (83,18 yosh), Gonkong (82,78 yosh), Andorra (82,65), Shveysariya (82,39 yosh), Gernsi (82,39 yosh) va Avstraliya (82,07 yosh) joy olgan.
O‘zbekiston ushbu reytingda 125-o‘rinni egallagan. Mamlakatimizda o‘rtacha umr davomiyligi 73,3 yilni tashkil etadi. Ushbu ko‘rsatkich bo‘yicha O‘zbekiston MDHga a’zo va unga yaqin bir qator mamlakatlarni — Qozog‘iston (150-o‘rin), Rossiya (151-o‘rin), Qirg‘iziston (153-o‘rin), Ukraina (156-o‘rin), Mo‘g‘uliston (158-o‘rin) va Tojikiston (166-o‘rin)ni ortda qoldirgan, deb ma’lum qildi “Kun”.
News-Asia.ru’ning yozishicha, O‘zbekistonda hozirgi vaqtda 100 yoshdan oshgan 1700 dan ortiq aholi istiqomat qilmoqda.
Shuningdek, AQSh MRB ma’lumotlariga ko‘ra, o‘rtacha umr davomiyligi Ozarbayjonda 71,9 yil, Belarusda 72,2 yil, Armanistonda 74,1 yil, va Gruziyada 75,7 yildan iborat. Reytingga Turkmaniston to‘g‘risidagi ma’lumotlar kiritilmagan.
Uzoq umr ko‘rish uchun yetarli sharoitlarga ega bo‘lmagan mamlakatlar uchligidan esa faqat Afrika vakillari – Gvineya-Bisau, Janubiy Afrika Respublikasi va Chad o‘rin olgan. Bu mamlakatlarda aholi o‘rtacha 40—50 yil umr ko‘radi.
Izoh (0)