2-may kuni “Turkiston” saroyida jurnalistika sohasida “Oltin qalam” IX Milliy mukofoti uchun xalqaro tanlov g‘oliblari va sovrindorlarini taqdirlashga bag‘ishlangan tantanali marosim tashkil etildi. 3-may – Jahon matbuoti erkinligi kuniga bag‘ishlab o‘tkazilgan ushbu tadbirda senatorlar, deputatlar, vazirlik va idoralar, ijodiy va jamoat tashkilotlari, diplomatik korpus va xalqaro tashkilotlarning O‘zbekistondagi vakolatxonalari vakillari, professor-o‘qituvchilar, faxriy jurnalistlar, talaba-yoshlar ishtirok etdi. Bu haqda O‘zA xabar berdi.
Televideniye, radio, bosma ommaviy axborot vositalari va internet-jurnalistika yo‘nalishlari bo‘yicha o‘tkazilayotgan bu yilgi ijodiy loyihada o‘n uchta – bitta Bosh milliy mukofot, har bir yo‘nalish bo‘yicha uchtadan mukofot ta’sis etilgan. Tanlov uchun mamlakatning barcha turdagi ommaviy axborot vositalarida mehnat qilayotgan 490 dan oshiq jurnalistdan 7500 ga yaqin ijodiy ish kelib tushdi. Ularni baholashda tanqidiy va tahliliy chiqishlarga, hayot haqiqati xolis aks ettirilgan, ijodiy izlanuvchanlik asosida tayyorlangan materiallarga alohida e’tibor qaratildi.
Tanlovni tashkil qilish, o‘tkazish, g‘oliblarni taqdirlash bilan bog‘liq sarf-xarajatlar uchun mablag‘ O‘zbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi tomonidan ajratildi.
O‘zbekiston Milliy teleradiokompaniyasining “Madaniyat va ma’rifat” telekanali jurnalistika sohasida “Oltin qalam” IX Milliy mukofoti uchun o‘tkazilgan xalqaro tanlovda Bosh mukofotga loyiq deb topildi. Telekanal maxsus diplom, “Oltin qalam” ko‘krak nishoni, statuetkasi va O‘zbekistonda belgilangan eng kam ish haqining 200 barobari miqdoridagi pul mukofoti bilan taqdirlandi.
– Yurtimizda milliy ma’naviyatimizni tiklash, uni zamon talablari asosida rivojlantirish, yosh avlodda sog‘lom va teran tafakkurni shakllantirishga ulkan e’tibor qaratilmoqda, – deydi “Madaniyat va ma’rifat” telekanali direktori Vohid Luqmonov. – Prezident tashabbusi bilan “Madaniyat va ma’rifat” telekanali tashkil etilib, bugungi kunda samarali faoliyat olib borayotgani mazkur soha ravnaqiga ko‘rsatilayotgan cheksiz g‘amxo‘rlikning amaliy ifodasidir. Bularning barchasi zimmamizdagi mas’uliyatni teran anglashga, yosh avlodda sog‘lom ma’naviyatni shakllantirishdek sharafli ishga yanada jiddiy yondashishga undaydi.
Ijodiy bellashuvning televideniye, radio, matbuot va internet-jurnalistika yo‘nalishlari bo‘yicha g‘oliblariga diplom, “Oltin qalam” ko‘krak nishoni, statuetkasi hamda pul mukofotlari topshirildi. Shu bilan birga, O‘zbekiston Kasaba uyushmalari federatsiyasi kengashi, Mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi tomonidan ta’sis etilgan nominatsiyalar bo‘yicha ham mukofotlar topshirildi.
Xususan, bu yilgi tanlovda Birlashgan Millatlar Tashkilotining O‘zbekistondagi axborot markazi, YuNESKO, Yevropada Xavfsizlik va hamkorlik tashkiloti, Jahon banki, BMTning OIV/OITS bo‘yicha Birlashgan dasturi – YuNEYDS, Xalqaro munosabatlar milliy demokratik instituti (AQSh), “Regional dialog” (Sloveniya) kabi xalqaro tashkilotlarning O‘zbekistondagi vakolatxonalari o‘z mukofotlari bilan ishtirok etdi. Tantanali marosimda bir guruh jurnalistlar ushbu tashkilotlarning rag‘batlantiruvchi mukofotlari bilan taqdirlandi.
Izoh (0)