AQSh boshqa mamlakatlarda uchuvchisiz samolyotlari zarbasidan halok bo‘lganlar haqidagi axborotni fosh qilmoqchi emas

AQSh boshqa davlatlarda Amerika uchuvchisiz samolyotlari urilishi natijasida halok bo‘lgan insonlar haqidagi ma’lumotlarni oshkor qilmoqchi emas. Bu haqdagi xabarni AQSh davlat kotibining jamoatchilik bilan aloqalar bo‘yicha yordamchisi Duglas Frans tasdiqladi, deb yozadi “ITAR-TASS”.

New York Review of Books jurnalining avvalroq ma’lum qilishicha, AQSh qirg‘in quroli ishlatadigan Pokiston va boshqa mamlakatlarda halok va mayib bo‘lganlar soni haqidagi yillik hisobotni nazarda tutuvchi qonun loyihasi Senat tomonidan tasdiqlanmagan.

Biroq Afg‘oniston, Pokiston, Yaman va boshqa davlatlarda AQSh havo hujumi qurbonlari haqidagi xabarlar baribir OAVga chiqib ketadi va Vashington obro‘siga putur yetkazadi. “Shunday ekan, bunday fosh qilishlarni kutib o‘tirmay, AQSh hukumatining o‘zi bundan xabardor qilib qo‘ya qolsa bo‘lmaydimi?” — degan savolga javoban, Duglas Frans dunyoning turli hududlarida uchuvchisiz samolyotlarni qo‘llash operatsiyasi AQSh milliy xavfsizligi uchun o‘ta muhim bo‘lgan ishning bir qismiligi, bu operatsiyaga tegishli tafsilotlar va faktlar maxfiy qolishi kerakligini ta’kidladi.