Germaniyaning Myunxen shahrida tennis bo‘yicha an’anaviy tarzda o‘tkazilib kelinadigan BMW Open by FWU AG xalqaro turniri birinchi davrasida Denis Istomin germaniyalik Filipp Kolshrayberga qarshi kortga chiqdi. Bu haqda “Turkiston press” xabar berdi.
Denis Istomin o‘zining tezkor o‘yini bilan dastlabki setni o‘z foydasiga 7:5 hisobida hal etdi. Ikkinchi setga kelib, Filipp o‘yin tizginini o‘z qo‘liga oldi va 6:2 hisobida Denisni mag‘lubiyatga uchratdi. Hal qiluvchi uchinchi setda Istomin mahorati yuqori darajada ekanligini isbotlab, uchrashuvni o‘z foydasiga hal qildi —hisob 6:4. Natijada O‘zbekiston vakili ikkinchi davraga yo‘l oldi.
Ma’lumot o‘rnida: Filipp Kolshrayber 2012-yil mazkur turnirda bosh sovringa ega bo‘lgan bo‘lsa, 2013-yilda finalga qadar yetib kelgan.
Eslatib o‘tamiz, BMW Open by FWU AG xalqaro turnirining mukofot jamg‘armasi 426 605 yevroni tashkil etadi.
Izoh (0)