25-aprel kuni “Turkiston” saroyida O‘zbekiston xalq shoiri Muhammad Yusuf tavalludining 60 yilligiga bag‘ishlangan ijodiy kecha bo‘lib o‘tdi. Unda parlament a’zolari, yozuvchi va shoirlar, adabiyotshunoslar, ma’naviyat targ‘ibotchilari, o‘qituvchilar, keng jamoatchilik vakillari, talaba-yoshlar ishtirok etdi, deb xabar bermoqda O‘zA.
Ijodiy kechada Muhammad Yusufning umr yo‘ldoshi Nazira Salomova yuksak e’tibor va g‘amxo‘rlik uchun Prezidentga minnatdorlik bildirdi.
– Istiqlol barcha qalam ahli singari Muhammad akaning ham erkin va samarali ijod qilishi uchun keng imkoniyatlar yaratdi, – deydi N. Salomova. – Davlatimiz rahbari tomonidan uning mehnatlari yuksak e’tirof etilib, xotirasini e’zozlash yuzasidan ko‘rsatilayotgan g‘amxo‘rlik va e’tibordan boshimiz ko‘kka yetdi.
Konsert dasturida shoir she’rlari bilan aytiladigan ashulalar yangradi.
Shuningdek, davlat rahbari qarori bilan shoirning 60 yilligi keng nishonlanayotgan shu kunlarda kino ijodkorlari tomonidan Muhammad Yusuf hayoti va ijodi haqida hujjatli film yaratildi hamda ushbu kinoasar adabiy kechada namoyish etildi.
Shu kuni O‘zbekiston xalq shoiri Muhammad Yusuf yashagan Toshkentning Mirzo Ulug‘bek tumanidagi Pushkin-Solor ko‘chasidagi 1-uyda shoir xotirasiga bag‘ishlab yodgorlik lavhasi o‘rnatildi.
Izoh (0)