Toshkent Fotosuratlar uyida O‘zbekiston xalq shoiri Muhammad Yusuf tavalludining 60-yilligiga bag‘ishlab “...Yurakni Vatanga qoldirib ketding” nomli badiiy ko‘rgazma ochildi. Bu haqda O‘zA xabar berdi.
O‘zbekiston Badiiy akademiyasi, Yozuvchilar, Bastakorlar uyushmalari, “O‘zbeknavo” estrada birlashmasi, O‘zbekiston davlat san’at va madaniyat instituti, O‘zbekiston davlat konservatoriyasi hamkorligida tashkil etilgan mazkur ko‘rgazmaga yozuvchi va shoirlar, adabiyotshunoslar, musavvirlar, fotoijodkorlar, talaba-yoshlar taklif etildi.
Ko‘rgazmada taniqli fotoijodkorlar, musavvirlar, shuningdek, Kamoliddin Behzod nomidagi Milliy rassomlik va dizayn instituti talabalari tomonidan shoir hayoti, uning asarlarida tarannum etilgan g‘oyalarga bag‘ishlangan ko‘plab fotosuratlar, kartinalar tomoshabinlar e’tiboriga havola etilmoqda.
– Muhammad Yusuf she’rlari Vatanni, tabarruk onalar, otaxonlarni, ibratli an’ana va qadriyatlarimizni ko‘z qorachig‘idek ardoqlashga o‘rgatadi, – deydi Kamoliddin Behzod nomidagi Milliy rassomlik va dizayn instituti talabasi Zamira Hasanova. – Shoirning “O‘zbekiston” nomli she’riga ilyustrativ kartina ishladim. Unda jannatmonand diyorimizning tuprog‘i onalardek aziz va muqaddas ekanini tasviriy vositalarda ifodalashga harakat qildim.
Tadbirda shoir she’rlari, uning so‘zi bilan aytiladigan qo‘shiqlar ijro etildi.
Izoh (0)