Time jurnali yilning eng nufuzli kishilari yuztaligi ro‘yxatini e’lon qildi. Jumladan, unda “Yetakchilar” toifasi bo‘yicha Rossiya prezidenti Vladimir Putin, Koreya Xalq Demokratik Respublikasi rahbari Kim Chen In, AQSh va Eron prezidentlari Barak Obama va Hasan Ruhoniy, Xitoy Xalq Respublikasi raisi Si Szinpin va Germaniya kansleri Angela Merkel qayd etilgan.
AQShning sobiq davlat kotibi Madlen Olbrayt nashrning iltimosiga binoan Rossiya prezidentining mazkur ro‘yxatga kiritilishiga izoh berdi. Diplomatning fikriga ko‘ra, “favqulodda millatparvarlik xususiyati Putinning reytingini ko‘tarib yubordi, biroq uning ortib borayotgan nufuzi o‘tkinchidir”.
“Qrimni o‘z tarkibiga qo‘shib olish bilan Rossiya yerga ega bo‘ldi, biroq ishonchni yo‘qotdi. Ba’zilar Putin Qrimni “egalladi” deb hisoblashadi, chunki tarixda ma’lum muddat zafar quchib, keyin tanazzulga yuz tutgan ko‘plab agressorlar bo‘lgan”, — dedi siyosatchi.
Ro‘yxatda “Kashfiyotchilar” yo‘nalishi bo‘yicha Edvard Snoudenning ham nomini uchratish mumkin. AQSh Maxsus xizmati va Milliy xavfsizlik agentligi sobiq xodimining mazkur ro‘yxatga kiritilishini WikiLeaks'ning sobiq vakili Daniel Domshtayt-Berg shunday izohlaydi: “U kompyuter geniysi edi, biroq u boylik keltiradigan ishni emas, to‘g‘ri ishni qilishni tanladi. U asl sarxadlarini idrok etish qiyin bo‘lgan global kuzatuv tizimi sirlarini fosh qildi”.
Izoh (0)