Rossiya Tashqi ishlar vaziri Sergey Lavrov Ukraina atrofidagi vaziyatga izoh berar ekan, Rossiya va uning fuqarolariga qarshi hujum uyushtirilgan taqdirda Rossiyaning ham aynan shunday javob berishini ma’lum qildi. “Agar bizning qonuniy manfaatlarimizga, rossiyaliklarning manfaatlariga Janubiy Osetiyada bo‘lgani kabi to‘g‘ridan-to‘g‘ri hujum qilinadigan bo‘lsa, men xalqaro huquq normalariga muvofiq holda harbiy yo‘l bilan munosib javob berishdan o‘zga chorani ko‘rmayapman”, — deb javob bergan vazir 23-aprel kuni Russia Today telekanaliga bergan intervyusida.
Ukraina Tashqi ishlar vazirligida Lavrovning bu so‘zlari Rossiyaning Ukrainaga qarshi zug‘um o‘tkazishga tayyorlanayotganligi sifatida qabul qilindi. Vaziyatga Kiyevning baho berishicha, Rossiya va rossiyaliklarga hujum uyushtirilishi ehtimoli Ukraina mojarolarga barham berish va ularni tinch yo‘l bilan hal qilish uchun intilayotgan bir paytda mutlaqo asossizdir.
G‘arbning Rossiya—Ukraina chegarasi yaqinida joylashgan rus qo‘shinlari borasidagi ayblovlariga Lavrov quyidagicha javob berdi: “Qo‘shinlarimiz o‘z hududimizda joylashgan. Ular Sergey Shoygu Mudofaa vaziri lavozimiga tayinlangandan beri muntazam amalga oshirilayotgan harbiy mashg‘ulotlarda ishtirok etgan”. Shuningdek, u o‘tgan yili mashg‘ulotlar Rossiyaning sharqiy qismida, Sibir, mamlakatning markaziy hududlari — Ukraina yaqinida tashkil etilganini eslatib o‘tgan.
Izoh (0)