Respublika mashinasozlik tarmog‘i korxonalari tomonidan 2014-yilning birinchi choragida 2933,7 milliard so‘mlik mahsulot ishlab chiqarilib, o‘sish sur’ati 2013-yilning yanvar-martiga nisbatan 126,0 foizni tashkil etdi. Bu haqda O‘zbekiston Respublikasi Davlat statistika qo‘mitasi xabar berdi.
O‘tgan yilning yanvar–mart oylariga nisbatan, yuk avtomobillarini ishlab chiqarish 20,7 foizga, yengil avtomobillar (maxsus avtomobillarsiz) — 15,7 foizga, avtobuslar ishlab chiqarish — 12,0 foizga oshdi. Yuqori qo‘shilgan qiymatli Gentra rusumidagi avtomashina ishlab chiqarish hajmi (11017 dona) o‘tgan yilga nisbatan sezilarli darajada o‘sgan, shuningdek, yangi rusumdagi Orlando oilaviy mini-venini ishlab chiqarish yo‘lga qo‘yildi.
Shu bilan birga porshenli dvigatellarni ishga tushirish uchun qo‘rg‘oshinli akkumulyatorlar (2013-yil yanvar-martiga nisbatan 103,0%), avtomobil dvigatellari (132,5%), radiatorlar, shovqinpasaytirgichlar, chiqarish trubalari, ssepleniyelar, rul chambaraklari (2,3 marta), yuruvchi g‘ildiraklar, ularning qismlari va jihozlari (4,1 marta)ni ishlab chiqarish hajmlari oshdi.
Hisobot davrida tarmoqning jami respublika sanoati hajmidagi ulushi 18,0 foizni tashkil etdi. Bu esa o‘tgan yilning shu davriga (15,3 %) nisbatan 2,7% punktiga ko‘pdir.
Izoh (0)