Tojikiston poytaxti Dushanbe shahrida 19-aprel kuni beshinchi an’anaviy xalqaro yarim marafon musobaqalari bo‘lib o‘tdi. “Poytaxt kuni” munosabati bilan tashkil etilgan bahslarda o‘zbekistonlik sportchilar muvaffaqiyatli ishtirok etdi. O‘zbekiston terma jamosining uch a’zosi ham sovrinlarga ega bo‘ldi. Bu haqda O‘zbekiston yengil atletika federatsiyasi matbuot xizmati xabar berdi.
Ayollar o‘rtasidagi musobaqada marra chizig‘ini birinchi bo‘lib termizlik Sitora Hamidova kesib o‘tdi. U yarim marafon masofasini yugurib o‘tish uchun 1 soat 16 daqiqa 33 soniya sarfladi. Yopiq binolarda jahon chempioni, ochiq arenalarda Yevropa vitse-chempioni bo‘lgan rossiyalik Yuliya Chijenkoni vakilamiz 19 soniyaga ortda qoldirdi. O‘z navbatida, farg‘onalik Marina Xmelevskayaga uchinchi o‘rinni egallashi uchun 21 soniya yetmadi.
Erkaklar o‘rtasidagi musobaqa kiyevlik Roman Romanenkoning g‘alabasi bilan tugadi. Ukraina poytaxtidan tashrif buyurgan sportchining natijasi 1 soat 6 daqiqa 12 soniyaga teng bo‘ldi.
Chempiondan bor-yo‘g‘i olti soniyaga ortda qolgan bekobodlik Andrey Petrov kumush medal egasiga aylandi. Andrey Rossiya va Keniya terma jamoalarining kuchli a’zolarini ortda qoldirdi.Musobaqa nizomiga ko‘ra, dastlabki olti o‘rin egalariga pul mukofotlari berilishi ko‘zda tutilgan edi. Jumladan, chempionlarga 3500 dollar, vitse-chempionlarga 3000 dollar va hokazo tartibda mukofot topshirildi.
Izoh (0)