Toshkentdagi “O‘zekspomarkaz”da “Dam olish dunyosi” xalqaro O‘zbekiston sayyohlik ko‘rgazmasi ochildi, deb xabar bermoqda O‘zA.
Anjuman “O‘zbekturizm” milliy kompaniyasi va “Buyuk Ipak yo‘li” reklama agentligi tomonidan Jahon sayyohlik tashkiloti, O‘zbekiston Respublikasi Madaniyat va sport ishlari vazirligi, Tashqi iqtisodiy aloqalar, investitsiyalar va savdo vazirligi, “O‘zbekiston havo yo‘llari” milliy aviakompaniyasi, “O‘zbekiston temir yo‘llari” davlat aksiyadorlik temir yo‘l kompaniyasi hamda Toshkent shahar hokimligi ko‘magida tashkil etildi. Tadbirning ochilishida mamlakatimiz va xorijiy davlatlarning sayyohlik firma va kompaniyalari, diplomatik korpus, mehmonxonalar vakillari, soha mutaxassislari, olimlar va ekspertlar ishtirok etdi.
Bugungi kunda O‘zbekistonda sayyohlikning ekoturizm, geoturizm, ekstremal, tibbiy va madaniy yo‘nalishlari, shuningdek, otda, tuyada, avtomobilda sayohat qilish, alpinizm, baliq ovi, rafting kabi ko‘plab turlari rivojlanmoqda. 900 dan ziyod sayyohlik korxonasi, jumladan, 430 mehmonxona, 530 dan ortiq sayyohlik kompaniyasi faoliyat ko‘rsatmoqda.
Ikkinchi bor o‘tkazilayotgan ushbu xalqaro ko‘rgazmada 30 dan ortiq xorijiy sayyohlik kompaniyasi vakillari ishtirok etmoqda. “Dam olish dunyosi” barcha zamonaviy yo‘nalishlarni o‘zida mujassam etgan. Xususan, unda ichki va tashqi turizm, faol va sarguzasht turizmi, ilmiy va sog‘lomlashtirish turizmi, sayyohlik ma’muriyatlari va milliy ofislar, turistik agentliklar va turoperatorlar, mehmonxonalar, sanatoriy-kurort majmualari, dam olish maskanlari, transport va sug‘urta kompaniyalari, on-layn bronlashtirish tizimlari kabi bo‘limlar ishlab turibdi.
– Kompaniyamiz O‘zbekiston bilan Singapur o‘rtasida ikki tomonlama sayyohlik almashuvini yo‘lga qo‘yish niyatida, – deydi Singapurning I-Asia turistik kompaniyasi ijrochi direktori Erik Yap. – Yaqinda Singapur bilan O‘zbekiston o‘rtasida to‘g‘ridan-to‘g‘ri aviaqatnov yo‘lga qo‘yilgani sayyohlik borasidagi ikki tomonlama hamkorlikni yanada kengaytirishga xizmat qilmoqda. Ushbu ko‘rgazmada mamlakatingizning turizm sohasidagi imkoniyatlari bilan yaqindan tanishish, bu borada O‘zbekiston sayyohlik firma va kompaniyalari bilan faol hamkorlik aloqalarini o‘rnatishni maqsad qilganmiz.
Ko‘rgazmada xorijning nufuzli xalqaro sayyohlik firmalari, milliy sayyohlik kompaniyalari, mehmonxona va restoranlar, muzeylar va boshqa tashkilotlar vakillari mamlakatimizning sayyohlik salohiyati va taklif etilayotgan xizmatlar, maftunkor tabiat va tarixiy obidalar aks etgan eksponatlar, xalq hunarmandligi buyumlari, fotoekspozitsiyalar, ekoturizm va sport turizmi, aviatransport, mehmonxona, sug‘urta va bank xizmatlari, milliy va hududiy sayyohlik tashkilotlari faoliyatiga oid ma’lumotlar bilan tanishmoqda.
Ikki kun davom etadigan ko‘rgazma doirasida mamlakatimizga sayyohlarni yanada kengroq jalb qilish borasida chet ellik mutaxassislar bilan o‘zaro fikr va mulohaza almashiladi, hamkorlikda qator loyihalarni amalga oshirish masalalari ko‘rib chiqiladi. Xorijning sayyohlik kompaniyalari bilan hamkorlikka oid qator bitimlar imzolanadi.
Ko‘rgazmaning birinchi kunida “Gastronomik turizm – raqobatbardosh mahsulot omili” mavzusida Jahon sayyohlik tashkilotining xalqaro ilmiy-amaliy konferensiyasi bo‘lib o‘tdi. Gastronomik turizm pazandachilik bilan bog‘liq barcha turistik faoliyat turlari, xususan, oziq-ovqat mahsulotlarini ishlab chiqaruvchi kompaniyalar, gastronomik festivallar, oziq-ovqat yarmarkalari va bu borada tajriba orttirishga xizmat qiluvchi sayohatlar majmuidir. Konferensiyada O‘zbekistonda gastronomik turizmni rivojlantirish, bu yo‘nalishda xalqaro hamkorlikni yanada kengaytirishga oid masalalar muhokama qilindi.
Ko‘rgazmaning ikkinchi kunida “Ipak yo‘li lazzati” milliy oshxona festivali o‘tkaziladi. Shuningdek, sayyohlik firma va kompaniyalarining taqdimotlari bo‘lib o‘tadi.
Izoh (0)