“Kamolot” yoshlar ijtimoiy harakati markaziy kengashi tashabbusi bilan o‘tkazilayotgan “Mening biznes g‘oyam” respublika tanlovining Qashqadaryo viloyati bosqichi bo‘lib o‘tdi. O‘zA ma’lumotlariga ko‘ra, tanlovda akademik litsey va kasb-hunar kollejlarining 140 nafar bitiruvchisi o‘z biznes loyiha va g‘oyalari bilan ishtirok etdi.
– Tabiiy jundan gilam to‘qish bo‘yicha taqdim etgan biznes rejam ma’qullanganidan xursandman, – deydi tanlov g‘olibi, Shahrisabz pedagogika kasb-hunar kolleji bitiruvchisi Aziza Sharipova. – Oilamiz ko‘p yillardan buyon gilam to‘qish bilan shug‘ullanadi. Maqsadim, gilamga naqsh solishda milliy va zamonaviy uslublarni uyg‘unlashtirib, mahsulotlarimizni xalqaro miqyosga olib chiqish. Tanlovda biznes g‘oyam tasdiqlanib, 9 million 600 ming so‘m miqdorida kredit ajratiladigan bo‘ldi. Bu mablag‘ga zamonaviy texnologiyalar xarid qilib, tengdoshlarimni ish bilan ta’minlashni rejalashtirganman.
Tadbir doirasida mutaxassislar tomonidan tadbirkorlik faoliyatini tashkil etish, biznes reja va uni ishlab chiqish qoidalari hamda bank krediti olishning tartibi xususida bitiruvchilarga batafsil ma’lumotlar berildi.
Tanlov so‘ngida 30 nafar ishtirokchining biznes g‘oyasi eng yaxshi loyiha deb topilib, ularga bank kreditlari ajratilishi bo‘yicha sertifikatlar topshirildi. 10 nafar bitiruvchi esa tanlovning respublika bosqichida qatnashish huquqini qo‘lga kiritdi.
Izoh (0)