2014-yilning birinchi choragida O‘zbekiston xalqaro moliya institutlari mablag‘larini jalb etish bo‘yicha uchta bitim imzoladi. Bu haqda O‘zbekiston Moliya vazirligi matbuot xizmati xabar berdi.
Ushbu bitimlar doirasida O‘zbekistonga 151 million dollar miqdoridagi kredit mablag‘lari jalb etildi.
Xususan, O‘zbekiston Respublikasi va Osiyo taraqqiyoti banki o‘rtasida “Qattiq maiishiy chiqindilarni boshqarish” loyihasi bo‘yicha Qarz shartnomasi tuzildi. Uning qarz miqdori 69 million dollarni tashkil etadi.Loyihaning maqsadi esa qattiq xo‘jalik va maishiy chiqindilarni yig‘ish, olib chiqish va joylashtirish tizimini takomillashtirish, shuningdek, Toshkent shahri va Toshkent viloyatidagi sanitariya vaziyatini yaxshilashdan iborat.
Farg‘ona va Marg‘ilon shaharlarida aholi va xo‘jalik subyektlarini kanalizatsiya xizmatlari bilan ta’minlash darajasini ko‘tarish, hamda ushbu shaharlarda ekologik vaziyatni yaxshilash maqsadida Osiyo taraqqiyoti banki bilan tuzilgan yana bir shartnoma esa 42 million dollarga teng.
Shuningdek, Xalqaro taraqqiyot uyushmasi bilan Andijon, Buxoro, Jizzax, Qashqadaryo, Samarqand, Sirdaryo, Toshkent va Farg‘ona viloyatlarida intensiv bog‘dorchilik, sabzavotchilik va uzumchilikning ilg‘or texnologiyalarini tadbiq etish, qishloq xo‘jaligi mahsulotlarini ishlab chiqaruvchilarni qishloq xo‘jalik mahsulotlarini qayta ishlash va uzoq muddatli saqlash uchun zamonaviy qishloq xo‘jaligi texnikalari, asbob-uskunalari bilan ta’minlash; hamda energiya tejamkor issiqxona xo‘jaliklarini tashkil etish maqsadida imzolangan shartnoma orqali 40 million dollar jalb etildi.
Izoh (0)