Yil oxirigacha Qashqadaryoda 2 ta kompressor stansiyasi ishga tushiriladi

O‘zbekiston Respublikasi Vazirlar Mahkamasining 2014-yil 9-apreldagi Qarori bilan Sho‘rtan va Olon gaz konlarida qolgan uglevodorod zaxiralarini maksimal darajada o‘zlashtirish hisobiga tabiiy gaz ishlab chiqarish hajmini oshirish maqsadida 2 ta investitsion loyihaning texnik- iqtisodiy  asoslari ma’qullandi. Unga ko‘ra, “SKS-2 (Siquv kompressor stansiyasi) qurilishi bilan  Sho‘rtan gaz konini qo‘shimcha obodonlashtirish” hamda “SKS  qurilishi bilan Olon gaz konini  qo‘shimcha obodonlashtirish” loyihasi amalga oshiriladi. Ushbu kompressor stansiyalarining shu yilning dekabr oyida ishga tushirilishi  ko‘zda tutilgan. Bu haqda “Pravda Vostoka” gazetasi xabar berdi.

Xususan, Olon gaz konida 27 ta quduqni obodonlashtirish va  yiliga 5 milliard metr kub tabiiy gaz ishlab chiqaradigan siquv kompessor stansiyasini qurish rejalashtirilgan. Loyiha qiymati 250,2 million AQSh dollariga teng.

Ushbu hujjatda investitson loyihalarning moliyaviy manbalari ham belgilangan.  Unga muvofiq, loyihalar “O‘zbekneftgaz” MXKning o‘z mablag‘lari, O‘zbekiston Taraqqiyot va rivojlanish jamg‘armasi kreditlari, shuningdek  “Xalq banki” DTB hamda boshqa mahalliy va xorijiy banklar kreditlari hisobiga amalga oshiriladi.

Tijorat banklari kreditlarini jalb qilish, loyihalarni amalga oshirish bo‘yicha zayom kelishuvlarini imzolash “O‘zbeknetfgaz” MXK zimmasiga yuklatildi.