Kecha, 15-aprel kuni Samarqanddagi Sadriddin Ayniy uy-muzeyida yozuvchi tavalludining 136 yilligiga bag‘ishlangan an’anaviy tadbir bo‘lib o‘tdi. Bu haqda Gazeta.uz xabar berdi.
Ayniyning uy-muzeyi Samarqand shahridagi Registon ko‘chasida joylashgan. U O‘zbekiston hukumati qarori bilan 1967-yil 19-mayda ochilgan.
Samarqanddagi prospektlardan biri va eski shahardagi maktabga yozuvchi nomi berilgan. Har yili 15-aprel kuni Sadriddin Ayniyning iste’dodini qadrlovchi kishilar yig‘ilib, “Ayniyxonlik” o‘tkaziladi. Unda maktab o‘quvchilari, talabalar, filologlar, yozuvchilar, shoirlar va, umuman, yozuvchi ijodiga qiziquvchilar qatnashadi.
Sadriddin Ayniy XX asr tojik va o‘zbek adabiyotining buyuk namoyandalaridan biridir. U o‘zining “Doxunda”, “Qullar” romanlari, “Odina”, “Yetim”, “Sudxo‘rning o‘limi” singari qissalari, to‘rt qismdan iborat “Esdaliklar” asarlari orqali yangi xildagi, zamonaviy tojik adabiyotiga asos soldi, shuningdek qardosh o‘zbek madaniyati, adabiyoti va san’ati taraqqiyotiga sezilarli ta’sir ko‘rsatdi. Shu sababli, Sadriddin Ayniy ijodiyoti har ikkala qardosh xalq uchun qadrli va qimmatlidir.
Izoh (0)